Daily Archives: Saturday, January 26, 2008

പോര്‍വിളി

Posted by & filed under കവിത.

ഒരായിരം സ്വപ്നങ്ങളുടെ ചിതയെരിയുന്നു ഒരുക്കിക്കൂട്ടിയ സ്വപ്നങ്ങള്‍ കൊരുത്ത നൂലിന്‍ ശക്തിക്കുറവാല്‍. എനിയ്ക്കു തെളിയ്ക്കാനൊരു തേരു തരൂ ജയിയ്ക്കാനൊരു പോരാളിയേയും എന്റെ സാരഥ്യം ഒന്നു കാ‍ണിയ്ക്കാന്‍ ഒരല്പം സമയവും. ഇന്നിന്റെ തോല്‍വിയെ, ഇന്നലെയുടെ സ്വപ്നങ്ങളെ നാളെയുടെ വിജയമാക്കാന്‍ എനിയ്ക്കാത്മ വിശ്വാസമേകൂ! എനിയ്ക്കിനിയുമുണ്ടല്ലോ ഒരുപാടു സ്വപ്നങ്ങള്‍ ഉറപ്പുള്ള നൂലില്‍ കോര്‍ക്കാനായി അവയെനിയ്ക്കു നഷ്ടപ്പെടാനാവില്ല എവിടെയെന്‍ പോരാളി? തേരിതു തയ്യാറല്ലൊ!

വെള്ളക്കൊടി

Posted by & filed under കവിത.

എന്റെ കണക്കുകൂട്ടലുകളെവിടെയോ പിഴയ്ക്കുന്നു. കുത്തിക്കുറിച്ചതു സത്യങ്ങള്‍ മാത്രം, തിരുത്താനായി ശ്രമിച്ചതു തെറ്റുകളെയും, പാഴ്ശ്രമമായതെന്തോ, യെനിയ്ക്കറിയില്ല. ഞാനെന്ന എന്റെ വിചാരങ്ങളെ എന്നിലെയെന്നിനു നന്നായറിയാം എന്റെ ചെയ്തികള്‍ക്കാരേ വിലപറയുന്നു? എനിയ്ക്കു കൈച്ചങ്ങലയിടുവതിനോ? ഒരു വിജയക്കൊടിയ്ക്കുവേണ്ടിയല്ല, എന്റെ കാഹളം ഞാനൂതിയതു, അതെന്റെ അഹങ്കാരത്തിന്റെ മുഴക്കവുമല്ല, ഞാനൊന്നേ ആശിച്ചുള്ളൂ, സമാധാനം! നിങ്ങളില്‍ അസന്തുഷ്ടി പരത്താന്‍ ഞാനൊട്ടും ആശിച്ചതില്ല എന്നിലെയെന്നെയറിയാത്തവരോടൊന്നു പറഞ്ഞോട്ടേ, നിങ്ങള്‍ക്കു സമാധാനം വരട്ടെ!