Daily Archives: Monday, March 31, 2008

ജീവിതദര്‍ശനം

Posted by & filed under കവിത.

ജീവിതമെന്തു വെറുമൊഴുക്കുമാത്ര,മന്ത- മേതുമേയില്ല,കര കാണ്മാനുമാവതില്ല. സ്വച്ഛന്ദമൊഴുകീടാം സ്വാര്‍ത്ഥത വെടിഞ്ഞു നീ സ്വസ്ഥമായ് ഗതിയ്ക്കൊത്തു നീന്തിയെന്നാകില്‍,പക്ഷേ ‘ഞാനെ’ന്ന വികാരത്തിന്നടിമപ്പെടുന്നാകി- ലായിരം പ്രശ്നങ്ങള്‍ തന്‍ ചുഴിയിലകപ്പെടാം, ഗതി മാറിടാം,ഒറ്റപ്പെട്ടിടാം,സ്വയം തീര്‍ത്ത വലയില്‍ കുടുങ്ങിയിട്ടൊട്ടേറെക്കുഴങ്ങീടാം. വിധിയാണെല്ലാമെന്നു പ്രലപിച്ചീടാം, വരും ദുരിതങ്ങളെയെല്ലാമൊന്നൊന്നായ് സഹിച്ചിടാം. ജീവിതമൊരു വെറും സ്വപ്നമാണെന്നും മായാ- മോഹമാണെന്നുമറിയുന്നവര്‍ക്കില്ലാ ദു:ഖം. പരിപൂര്‍ണ്ണതയ്ക്കെഴും പരമാണുവെന്നാലു- മെഴുതപ്പെട്ടല്ലോ നിന്‍ ഭാഗഭാക്കീലോകത്തില്‍ ഇവിടെജ്ജീവിയ്ക്കുകയല്ല നീ മറിച്ചിന്നു നിനയ്ക്ക,നിന്‍ ജീവിതം ജീവിയ്ക്കപ്പെടുന്നല്ലോ! ഒഴുകൂ ഗതിയ്ക്കൊത്തു, ഭാഗഭാക്കാവൂ, നിന- ക്കൊരൊട്ടു നിയന്ത്രണമില്ലിതെന്നറിഞ്ഞിടൂ ഒന്നെന്ന സമ്പൂര്‍ണ്ണത തന്നിലേയ്ക്കൊഴുകിടൂ ഒന്നിനേക്കുറിച്ചുമേ ചിന്തിയ്ക്കാതിരുന്നിടൂ!