മുംബൈ പൾസ്-31 (ജഹാംഗീർ ആർട്ട് ഗാലറിയും മനീഷ് മാർക്കറ്റും)

Posted by & filed under മുംബൈ പൾസ്.

ഇന്നു മുംബെയിലെ ജഹാംഗീർ ആർട്ട് ഗാലറിയിൽ പ്രശസ്തനായ ഒരു മലയാളി ചിത്രകാരനായ ശ്രീ എം. നാരായണൻ നമ്പൂതിരിയുടെ“Scream of Solittude” എന്ന പേരോടു കൂടിയ പ്രദർശനം ആസ്വദിയ്ക്കാനിടയായി. ഇദ്ദേഹം കൽക്കത്തയിൽ പ്രശസ്തമായ  വിക്റ്റോറിയാ മെമ്മോറിയൽ  ഹാളിൽ റെസ്റ്റോറേഷൻ ഡിപ്പാർട്ടുമെന്റിൽ ക്യൂറേറ്റർ ആയി  ആർട് റെസ്സറക്ഷൻ നടത്തി വരുന്നു.  ഞങ്ങൾ കൽക്കത്തയിൽ താമസിയ്ക്കുന്ന കാലത്തു പലപ്പോഴും വിക്ടോറിയ മെമ്മോറിയൽ സന്ദർശിയ്ക്കുന്ന സമയത്ത് ഇദ്ദേഹത്തെ കാണാനും പരിചയപ്പെടാനുമിടയായിട്ടുണ്ട്. ഫോർട്ട് ഏരിയയിൽ കാലാഘോഡയിൽ സ്ഥിതി ചെയ്യുന്ന ഈ ആർട്ട് ഗാലറിയിലേയ്ക്ക് പോകുന്ന സമയം വഴിയരികിലായി ഫുട്പാത്തിൽ നിരനിരയായിവച്ചിരിയ്ക്കുന്ന പുസ്തകങ്ങൾ എന്നെ മാടി വിളിയ്ക്കുന്നതായിത്തോന്നി. ഒരു നിമിഷം അവയെന്നെ വർഷങ്ങൾക്കു പുറകിലേക്യ്ക്കു കൂട്ടിക്കൊണ്ട് പോയതു പോലെ തോന്നി. മനസ്സിന്റെ ആകർഷണത്തിനു കടിഞ്ഞാണിടാൻ ശ്രമിച്ചു  കൊണ്ടു മുന്നോട്ട് നടക്കുമ്പോഴും മനസ്സ് അവയിൽ ഉടക്കി നിൽക്കുന്നതു പോലെത്തന്നെ തോന്നി. വർഷങ്ങൾക്കു മുൻപായി ഓഫീസ് ആവശ്യത്തിന്നായി ദിവസവും ഈ ഏരിയയിൽ വരുമായിരുന്നു. തിരിച്ചു പോകുന്ന സമയത്തു ദിവസവും കുറച്ചു സമയം ഫുട്പാത്തിലെ പുസ്തകങ്ങൾക്കിടയിൽ ചിലവിടാറുള്ളതോർമ്മ വന്നു. ഇന്ന് എന്റെ പുസ്തക  അലമാരിയിൽ ഇരിയ്ക്കുന്ന  പല പുസ്തകങ്ങളും ശേഖരിയ്ക്കപ്പെട്ടത് ഇത്തരം സ്ഥലങ്ങളിൽ നിന്നും തന്നെ.

കലാപ്രേമികളുടെ അറിവിനായി ശ്രീ നാരായണൻ നമ്പൂതിരിയെക്കുറിച്ചൊരൽ‌പ്പം. ബറോഡയിലെ എം.എസ്. യൂണിവേർസിറ്റിയിൽ നിന്നും അപ്പ്ളൈഡ് ആർട്ട്സിൽ ഡിപ്ലോമ, ന്യൂഡെൽഹിയിലെ നാഷണൽ മ്യൂസിയത്തിലെ റെസ്റ്റോറേഷൻ ഡിപ്പാർട്ടുമെന്റിൽ പരിശീലനം എന്നിവയ്ക്കു ശേഷം 1989 മുതൽ കൽക്കത്തയിലെ പ്രസിദ്ധമായ വിക്ടോറിയ ഹാളിൽ ഓയിൽ പെയിന്റിംഗിലെ ടെക്നികൽ റെസ്റ്റോറർ ആയി ഇദ്ദേഹം പ്രവർത്തിച്ചു വരുന്നു. രാജ്യത്തിന്റെ വിവിധ ഭാഗങ്ങളിലായുള്ള പ്രസിദ്ധ ഗാലറികളിൽ ഇദ്ദേഹത്തിന്റെ സോളൊ എക്സിബിഷനുകൾ നടന്നിട്ടുണ്ട്.

ശ്രീ നാരായണൻ നമ്പൂതിരിയുടെ ചിത്രങ്ങൾ ജഹാംഗീർ ആർട്ട് ഗാലറിയിലെ ഒന്നാം നിലയിലെ ഹിർജി ഹാളിൽ ആണ് പ്രദർശിയ്ക്കപ്പെട്ടിരുന്നത്. നവംബർ 22 മുതൽ-28 വരെ. സ്പെഷ്യലായി ഉണ്ടാക്കിയിരിയ്ക്കുന്ന ഹാൻഡ് മെയ്ഡ് പേപ്പറിലെ വാട്ടർ കളർ പെയിംറ്റിംഗുകൾ(18“*26“) അവയുടെ തീമുകളാലും നിറക്കൂട്ടുകളുടെ ഭംഗിയാലും ഹാളിൽ പ്രവേശിച്ചപ്പോൾ പെട്ടെന്നു തന്നെ ശ്രദ്ധയിൽ‌പ്പെട്ടു. അവയുടെ കാഴ്ച്ചയിലെ യൂണിഫോമിറ്റിയും അന്തർലീനമായ തുടർച്ചയുടെ ഭാവവും ആസ്വാദകരെ കൂടുതൽ ആകർഷിച്ചുകാണും. അബോധ മനസ്സിന്നുള്ളിലെവിടെയോ നിന്നും അറിയാതെ പുറത്തു ചാടിയ  അപൂർണ്ണമായ ചിന്താശകലങ്ങളിലെ കൂട്ടുകാരെന്നപോൽ അവ്യക്തമായ മനുഷ്യരൂപങ്ങളും പാമ്പും കിളിയുമെല്ല്ലം കുട്ടിക്കാലത്തിന്റെ ഓർമ്മകളിലൂടെ ചിത്രങ്ങളിൽ സന്നിവേശിപ്പിയ്ക്കാനുള്ള ഇദ്ദേഹത്തിന്റെ ശ്രമം വിജയിച്ചിട്ടുണ്ടെന്നു നിസ്സംശയം പറയാം.മരങ്ങൾ നിറഞ്ഞു നിൽക്കുന്ന പാമ്പിൻ കാവുകൾ മനസ്സിൽ‌പ്പതിപ്പിച്ച ദൃശ്യങ്ങൾ അറിയാതെ പൊന്തി വന്നു നിറങ്ങളിൽക്കുളിച്ചു നിൽക്കുന്നതു പോലെ.ആരാധന തോന്നി, സത്യത്തിനേയും മിഥ്യകളെയും ഉള്ളിലുറങ്ങിക്കിടക്കുന്ന യാഥാർത്ഥ്യങ്ങളുടെ തനിമയിയന്ന രൂപങ്ങളേയും ഇത്രമാത്രം ആകർഷകമാക്കി കാൽ‌പ്പനികത്വത്തിന്റെ പരിവേഷമണിയിച്ച് നിറച്ചാർത്തുകളുടെ തിളക്കത്തിൽ ജീവൻ കൊടുക്കാൻ കഴിയുന്ന ആ പ്രത്യേക കഴിവിൽ. കളർ ടോണുകളും സ്ട്രോക്കുകളും അവയിലൂടെ ഉരുത്തിരിയുന്ന അവ്യക്തത നിറഞ്ഞ ഒട്ടേറെ രൂപങ്ങളും ഭാവനയുടെ മിഴിവിനാൽ  കലാകാരന്റെ കഴിവിനെ വിളിച്ചോതുന്നവ തന്നെ. ചിത്രങ്ങൾക്കൊന്നിനും പ്രത്യേകമായി പേർ കൊടുത്തിട്ടില്ല.അദ്ദേഹത്തിന്റെ തന്നെ പ്രിയപ്പെട്ട ചിത്രമായ പഴയ രീതിയിൽ വസ്ത്രം ധരിച്ച അവ്യക്തമായ സ്ത്രീരൂപം പല ആംഗിളുകളിൽ നിന്നായി നോക്കുമ്പോഴും കൂടുതൽക്കൂടുതൽ ആകർഷകമായിത്തോന്നി. വാട്ടർകളർ  ഈ ചിത്രകാരന്റെ എക്സ്പ്രഷൻ രീതിയ്ക്കു തികച്ചും അനുയോജ്യം തന്നെ എന്നു തോന്നി.

ആർട്ട് ഗാലറിയിലെ താഴത്തെ നിലയിൽ അക്രിലിക് കാൻവാസുകളിലെ ‘phantoms of physicality'( ആർട്ടിസ്റ്റ് ചിരു ചക്രവർത്തി) നിറക്കൂട്ടുകളുടെ മിഴിവാൽ ശ്രദ്ധേയമായി. തീവണ്ടികളും കപ്പലുകളും വിവിധതരം മനോഹരമായ നഗരക്കാഴ്ച്ചകളുമായി CANVASഒരുക്കിയ  ആർട്ടിസ്റ്റ് സുരേഷ് ഭോസലെ,ലാളിത്യമേറിയതും ഇളം നിറങ്ങളുടെ സങ്കലനത്താൽ ഹൃദ്യവുമായ പ്രകൃതിദൃശ്യങ്ങൾ  കാൻവാസിൽ സൃഷ്ടിച്ച ആർട്ടിസ്റ്റ് സി.എൻ. പാട്ടീൽ,കടും നിറങ്ങളുടെ വർണ്ണപ്പകിട്ടിനാൽ ചാരുത നിറയ്ക്കാനായ ചിത്രങ്ങളുമായി ആർട്ടിസ് നിതിൻ എന്നിവരും കണ്ണുകൾക്കും മനസ്സിന്നും നൽകിയ വിരുന്നുകൾ ഏറെ കുളിർമ്മയേറിയവ തന്നെയായിരുന്നു.

കുളിർമ്മയേറിയ ഈ ദൃശ്യങ്ങൾ നമുക്കേകിയ മഹാനഗരിയുടെ അധികം ദൂരെയല്ലാത്ത മനീഷ് മാർക്കറ്റിൽ അപ്പോഴും തീ പൂർണ്ണമായണഞ്ഞിരുന്നില്ല.  വെള്ളിയാഴ്ച്ചരാത്രി മുതൽ കത്തിയെരിയുന്ന   മനീഷ് മാർക്കറ്റും സര -സഹാര കോമ്പ്ലെക്സും തിരിച്ചുപോരുമ്പോൾ ബ്രിഡ്ജിനു മുകളിൽ നിന്നും കാണാനായി. പലപ്പോഴും മനീഷ് മാർക്കറ്റ് സന്ദർശിയ്ക്കാനിടയായിട്ടുണ്ട്. നഗരിയിലെ പ്രസിദ്ധമായ ക്രാഫോർഡ് മാർക്കറ്റിനടുത്തുള്ള ഈ ഹോൾ സെയിൽ മാർക്കറ്റിലെ 500ൽ‌പ്പരം കടകളാണ് കത്തി നശിച്ചത്. ഈ വൻ അഗ്നി ബാധ അട്ടിമറിയാണെന്നും   സംശയിയ്ക്കപ്പെടുന്നു. ലക്ഷക്കണക്കിനു രൂപയുടെ സാധനങ്ങൾക്കൊപ്പം ലക്ഷക്കണക്കിനു രൂപയും കത്തി നശിച്ചുവെന്നാണറിയാൻ കഴിഞ്ഞത്. കടകൾക്കൊപ്പം എത്ര കച്ചവടക്കാരുടെ മനസ്സിലേയ്ക്കും ഈ തീ പടർന്നു കാണും? മൊത്തം100 കോടിയുടെ  നഷ്ടമാണ് കണക്കാക്കപ്പെട്ടിട്ടുള്ളത്.

മുംബൈ പൂരത്തിന്റെ സ്പെഷ്യൽ എപ്പിസോഡുമായി  എൻ.കെ. ഹോംസിന്റെ‘ആംചി മുംബൈ‘ യുടെ പ്രക്ഷേപണം കൈരളി ടി.വി. യിൽ ,ഈയാഴ്ച്ച തുടങ്ങിയത് നഗരവാസികളെ അഭിമാനഭരിതരാ ക്കിയിരിയ്ക്കുന്നു.മുംബൈ മലയാളികളൊന്നടങ്കം ആകാംക്ഷയോടെ കാത്തിരുന്ന ഈ പരിപാടിയ്ക്കു നല്ല വരവേൽ‌പ്പാണ് കിട്ടിയിരിയ്ക്കുന്നത്  .എന്‍ കെ ഹോംസ് ആംചി മുംബൈ എല്ലാ ഞായറഴ്ച്ചകളിലും രാവിലെ എട്ടു മുപ്പതിനായിരിയ്ക്കും പ്രക്ഷേപണം നടത്തുക. മുംബൈ നഗരത്തെക്കുറിച്ചും ഇവിടത്തെ വിശിഷ്ട വ്യക്തികളെക്കുറിച്ചും പ്രതിഭകളെക്കുറിച്ചും നഗരിയ്ക്കകത്തും പുറത്തുമുള്ളവർക്ക് ഒർപോലെ  അറിയാനുള്ളൊരു സുവർണ്ണാവസരം കൂടിയാണിത്.കാണാൻ മറക്കണ്ട.

വൃശ്ചികത്തിന്റെ ആഗമനം വിളിച്ചോതുന്നവിധം നഗരത്തിന്റെ ഏതു ഭാഗത്തും  അയ്യപ്പഭക്തന്മാരെ കാണാനാകുന്നു. ശബരിമല സീസൺ പ്രമാണിച്ചാവാം പ്രകൃതിയും ഒരല്പ്പം മാറിയിരിയ്ക്കുന്നുവോ?പ്രഭാതങ്ങൾക്കൊരൽ‌പ്പം തണുപ്പ് തോന്നിത്തുടങ്ങിയിരിയ്ക്കുന്നു.നമ്മളെയൊക്കെസ്സംബന്ധിച്ചിടത്തോളം ഈ  സമയം ഗൃഹാതുരത്വത്തിന്റെ കൂടിയാണെന്നു തോന്നും. വൃശ്ചികക്കാറ്റിന്റെ അകമ്പടിയോടെ ഉറച്ചു വരുന്ന തണുപ്പിൽ കുളിച്ചീറനായി വരുന്ന അയ്യപ്പഭക്തന്മാർ കേരളത്തിന്റെ ഗ്രാമവീഥികളെ ശരണം വിളികളാൽ ഭക്തിയുടെ കുളിരണിയിയ്ക്കുന്ന സമയമാണല്ലോ ഇത്. ഇത്തവണ  വൃശ്ചികം ഒന്നിന് നാട്ടിൽ പ്പോയി ഗുരുവായൂരപ്പദർശനം നടത്താനായി . ഏകാദശി പോലീസ് വിളക്കു ദിവസമായിരുന്നു.എണ്ണാനാകാത്തത്ര വലിയ വിളക്കുകൾ നിരനിരയയി വച്ചിരിയ്ക്കുന്നു. വല്യമ്പലത്തിൽ വരിവരിയായി കെട്ടുംനിറയ്ക്കുവേണ്ട സാധനസാമാഗ്രികളുമായി അയ്യപ്പന്മാരെ കെട്ടു നിറയ്ക്കാൻ സഹായിയ്ക്കുന്ന പെരിയസ്വാമിമാരും  ഭക്തിപൂർവം അവർക്കു മുന്നിലായി കുളീച്ചീറനായി കറുത്തവസ്ത്രം ധരിച്ച അയ്യപ്പന്മാരും . അനൌൺസുമെന്റുകൾ തമിഴും തെലുങ്കും കന്നഡയും മലയാളവും ഇംഗ്ലീഷുമായി ഒഴുകി വരുന്നു. അമ്പലത്തിനു പുറത്തു മഞ്ഞുളാൽ വരെയും തിരക്കാണ്. അന്യഭാഷക്കാരാണു അധികമെന്നു കണ്ടു. വിദേശീയരും ധാരാളം.ഇതെല്ലാം കാണുമ്പോൾ വല്ലപ്പോഴും വന്നു പോകുന്ന നമുക്കെല്ലാം ഒരു അപരിചിതത്വം തോന്നിത്തുടങ്ങുന്നുവോ? ഗുരുവായൂർ നിന്നും തിരികെ വരുമ്പോൾ പണ്ടു പഠിച്ച ശ്രീ കൃഷ്ണാ കോളേജ് സ്റ്റോപ്പെത്തിയപ്പോൾ കോളേജ് ഒന്നു കാണാൻ മോഹം. കാർ കോളേജ് ഗെയിറ്റിനുള്ളീലേയ്ക്കെടുത്ത് കോമ്പൌണ്ടിലൊക്കെയൊന്നു ചുറ്റിച്ചു പുറത്തേയ്ക്കിറങ്ങുമ്പോൾ ഗ്രൌണ്ടിൽ ക്രിക്കറ്റ് കളിയ്ക്കുന്നവരിൽ ഒട്ടേറെപ്പേർ കൌതുകത്തോടെ നോക്കുന്നു…പ്രവാസിയുടെ ഈ ഗൃഹാതുരത്വത്തിനെക്കുറിച്ചിപ്പോൾ അവർക്കെന്തു മനസ്സിലാകാൻ?

(Published in’ WHITELINE VARTHA’ (print) Newspaper weekly tabloid from Mumbai .See www.whitelineworld.com)

Leave a Reply

Your email address will not be published. Required fields are marked *