നഗരം വിസ്മയമേകുമ്പോൾ-മുംബൈ പൾസ്-37

Posted by & filed under മുംബൈ പൾസ്.

mutt.JPGനഗരം അതിന്റെ  മടക്കുകളിൽ പലയിടത്തുമായി നമുക്കായി പല അതിശയങ്ങളും ഒളിച്ചു വയ്ക്കുന്നു.  അതു കണ്ടെത്തുമ്പോൾ പലപ്പോഴും നാമൊരു  കൊച്ചു കുട്ടിയുടെ മനസ്സുമായി അതിലേയ്ക്കാകർഷിയ്ക്കപ്പെടുന്നു. ഇത്രയും കാലം നഗരത്തിന്റെ ഭാഗമായി ജീവിച്ചിട്ടും ഇതുവരെ ഇതു കണ്ടെത്താനായില്ലെന്ന സത്യം നഗരത്തിന്റെ നിഗൂഡതകളിലേയ്ക്ക് വിരൽ ചൂണ്ടുന്നു. ഇതു പോലെ ഇനിയുമെത്രയോ അറിയപ്പെടാത്ത കാര്യങ്ങൾ ഈ നഗരത്തിനു നമ്മോട് പറയാനുണ്ടാകുമെന്ന പരമാർത്ഥം നഗരത്തെ കൂടുതൽ വിസ്മയം നിറഞ്ഞതാക്കി മാറ്റുന്നു. ഒരു പക്ഷേ നിങ്ങൾക്കെല്ലാം തന്നെ പലപ്പോഴും ഇത്തരം അനുഭവങ്ങൾ ഉണ്ടായിട്ടുണ്ടെന്നു വരാം.

മംഗലാപുരത്തിന്നടുത്തുള്ള കുക്കി സുബ്രഹ്മണ്യക്ഷേത്രത്തെക്കുറിച്ചു മുൻപ് വായിച്ചിട്ടുണ്ട്. സൌത് കനറയിലെ ഈ അമ്പലം സ്ഥിതിചെയ്യുന്നത് കുമരപർവ്വതത്തിൽ നിന്നുത്ഭവിച്ച് അറബിക്കടലിനെ പുണരുന്ന ധാരാനദിയുടെ തീരത്താണ്. താരകാസുര നിഗ്രഹത്തിനുശേഷം  ഭക്തജനങ്ങളൂടെ ആഗ്രഹപ്രകാരം സുബ്രമണ്യസ്വാമി ഇവിടെ  വാഴുന്നുവെന്നും ഗരുഡന്റെ ശല്യത്താൽ  ഭയഭീതനായ വാസുകിയുടെ പ്രാർത്ഥനകേട്ട ശ്രീപരമേശ്വരൻ രക്ഷയ്ക്കായി സുബ്രമണ്യസ്വാമിയെ സദാ കൂടെ നിർത്തിയതാണെന്നുമെല്ലാം ഈ അമ്പലത്തെക്കുറിച്ച് ഐതിഹ്യമുണ്ട്.സർപ്പദോഷം നീങ്ങാനും വിട്ടുമാറാത്ത കുഷ്ടരോഗം തുടങ്ങിയ അസുഖങ്ങൾ നീങ്ങാനുമുള്ള പ്രാർത്ഥനകളോടെ പരിഹാരാർത്ഥം പൂജകൾക്കായി ഭക്തർ ഇവിടെയെത്തുന്നു.ഈ അമ്പലത്തിന്റെ ഒരു ശാഖയാണു ചെമ്പൂർ ഛേഡ്ഡാ നഗറിൽ എനിയ്ക്കു കാണാനായത്.

ഒരു ബന്ധുവിന്റെ ക്ഷണമനുസരിച്ച്  ഒരു സ്വകാര്യച്ചടങ്ങിൽ സംബന്ധിയ്ക്കാനായാണ് ഞാൻ ചെമ്പൂരിലെ ഈ അമ്പലത്തിൽ എത്തിയത്. ഗേറ്റ് കടന്ന്  അകത്തു ചെന്നാലുടൻ തന്നെ  അഴികളിട്ട കൊച്ചു അമ്പലത്തിന്നകത്തായി അഞ്ചു തലകളോടു കൂടിയ സർപ്പരാജാവ്. മന്ത്രോച്ചാരണങ്ങൾ മുഴങ്ങുന്നു. അമ്പലത്തിനു   തൊട്ടു മുന്നിലായി അതിമനോഹരമായി വർച്ചിരിയ്ക്കുന്ന കളം.വർണ്ണങ്ങളുടെ  മനോഹാരിതയും മന്ത്രങ്ങളുടെ സംഗീതധ്വനിയും ഭക്തിയുടെ പാരമ്യതയും  കൂടിച്ചേന്ന അന്തരീക്ഷം.  പെട്ടെന്നു മനസ്സിൽ അറിയിയ്ക്കാനാവാത്ത എന്തെല്ലാമോ  ഭാവങ്ങൾ ഉണർന്നതുപോലെ. ആദ്യമായാണ് ഇത്രയും വലിയൊരു  നാഗപ്രതിഷ്ഠയും  അമ്പലവും കാണാനിടയായത്. തൊഴുതു പുറത്തു കടന്നപ്പോൾ അവിടെ പലവ്യിിദ്യിധ വഴിപാടു പൂജകളും നടക്കുന്നതായി കണ്ടു. അതിൽ പങ്കുകൊള്ളുന്നതിന്നായി ഒട്ടേറെ ഭക്തജനങ്ങളും വന്നെത്തിയിട്ടുണ്ട്. മുകളിൽ ഒന്നാമത്തെ നിലയിലായിട്ടാണ് ലക്ഷ്മീ നരസിംഹമൂർത്തിയുടെ അമ്പലം. സർവ്വം വെള്ളിമയം.വിഗ്രഹങ്ങളും പൂജാപാത്രങ്ങളും മണ്ഡപവുമെല്ലാം തന്നെ.  ഇവിടത്തെ പൂജയിലും പങ്കെടുക്കാനായി. പ്രത്യേകതാളത്തിലുള്ള കൊട്ടും മണിയടിയും മന്തോച്ചാരണങ്ങളും നിറഞ്ഞ അന്തരീക്ഷം തികച്ചും ഭക്തിസാന്ദ്രമായിത്തോന്നി. മുംബെയിലാണിതെന്ന വസ്തുത തൽക്കാലം മറന്നു പോയി. ഹരിദ്വാറിലെ ശിവാനന്ദാശ്രമത്തിലെ ശ്രീകൃഷ്ണ ക്ഷേത്രത്തിൽ  നാഗരാജപ്രതിമയ്ക്കു മുന്നിൽ കൂപ്പുകൈകളോടെ നിൽക്കുമ്പോൾ കേട്ട അലൌകികമായ ദീപാരാധനയുടെ  താളദ്ധ്വനി ഒരു നിമിഷം മനസ്സിലേയ്ക്കോടിയെത്തിയതുപോലെ തോന്നി. എല്ലാ നഗദൈവങ്ങൾക്കും മുന്നിൽ നിന്നാൽ ഇങ്ങനെത്തന്നെ തോന്നുമോ, ആവോ?

രണ്ടാമത്തെ നിലയിൽ ഭഗവത സപ്താഹം നടക്കുന്നതിന്റെ അലയൊലികൾ താഴോട്ടേയ്ക്കും ഒഴുകിയെത്തുന്നു. സപ്താഹത്തിൽ പങ്കെടുക്കുന്നതിനായി ഒട്ടേറെപ്പേർ വന്നും പോയിക്കൊണ്ടിരിയ്ക്കുന്നു. ഒരേ സമയം മൂന്നു സ്ഥലങ്ങളിലായി നടക്കുന്ന ഭഗവത്പൂജകൾ  മനസ്സിൽ ഭക്തിയുണർത്തി.   ലക്ഷ്മീ നരസിംഹസ്വാമിയുടെ അമ്പലത്തിലെ പൂജയ്ക്ക ശേഷം ദീപാരാധനത്തട്ടിലെ പ്രകാശം മനസ്സിലും പകർന്നപോലെ . പൂജയ്ക്കു ശേഷം കിട്ടിയ  തീർത്ഥം മനസ്സിനെയും കുളിർപ്പിച്ചതായിത്തോന്നി.

ഹാളിൽ നിൽക്കുമ്പോൾ ജനലിലൂടെ തണുത്ത കാറ്റ് അരിച്ചെത്തുന്നുണ്ടായിരുന്നു. പുറത്തെ വിശാലമായ മൈതാനത്തിൽ കുട്ടികൾ  ക്രിക്കറ്റ് കളിയ്ക്കാനായും മറ്റും ഉപയോഗിയ്ക്കുന്നു. എന്റെ കുട്ടികളും പരിശീലനത്തിന്നായി പലവട്ടം ഇവിടെ വന്നിട്ടുണ്ടെന്നറിഞ്ഞു. തനി നാടൻ അന്തരീക്ഷം . ഒരു നിമിഷം നാട്ടിലെത്തിച്ചേർന്നോ  എന്നു സംശയിച്ചുപോയി. താഴെ കോമ്പൌണ്ടിൽ കണ്ട കൊച്ചു കിണറും മുറ്റവും നാടിനെ അനുസ്മരിപ്പിച്ച.നഗരത്തിൽ സാധാരണ കാണാനാകാത്ത ദൃശ്യങ്ങൾ നമ്മിൽ ആശ്ചര്യമുളവാക്കുന്നു.

മുംബെയുടെ ഇതര ഭാഗങ്ങളെയപേക്ഷിച്ചു നോക്കുമ്പോൾ  ഛെഡ്ഡാ നഗറും പരിസരവും  യാതൊരുവിധ മാറ്റങ്ങൾക്കും അടിമപ്പെട്ടിട്ടില്ലെന്നു കാണാനായി .തൊട്ടപ്പുറത്തുകൂടു കടന്നു പോകുന്ന ഹൈ വേ വലുതായിക്കഴിഞ്ഞിരിയ്ക്കുന്നു.  പുതിയ ഫ്ലൈ ഓവറുകളും  സ്കൈ വാക്കുകളും വരുത്തിയ മാറ്റങ്ങൾ ഇങ്ങോട്ട് ബാധിച്ചിട്ടില്ല റീഡവലപ്പ്മെന്റെ ജ്വരം പിടിപെടാത്തതും ഈ ഭാഗത്തിന്റെ ഭംഗിയെ നിലനിർത്തി. വഴിയുടെ ഇരുപുറവും കാൽനട യാത്രക്കാർക്കു തണൽ നൽകി നിറയെ പൂക്കളും ഇലകളും നിറഞ്ഞ മരങ്ങൾപുഞ്ചിരി തൂകി നിൽക്കുന്നത് കണ്ടപ്പോൾ മുംബെ നഗരത്തിലെ അപൂർവ്വമായ ഈ കാഴ്ച്ച മനസ്സിൽ  ശരിയ്ക്കും സന്തോഷം നിറച്ചു.

മുംബൈ മാറ്റങ്ങൾക്കധീനപ്പെട്ടുകൊണ്ടേയിരിയ്ക്കുന്നു. കഴിഞ്ഞ ഏതാനും വർഷങ്ങൾ ഇവിടെ വരുത്തിയ മാറ്റങ്ങൾ പുരോഗതിയുടേതെന്നാണ് കണക്കാക്കപ്പെടുന്നതെങ്കിലും പലപ്പോഴും ഉള്ളിലൊരൽ‌പ്പം ദു:ഖമാണ്  കൊണ്ടുവരുന്നതെന്നു തോന്നാറുണ്ട്. മുംബെയുടെ ഒരുവിധം ഒഴിഞ്ഞ സ്ഥലങ്ങളെല്ലാം അപ്രത്യക്ഷമായിക്കഴിഞ്ഞിരിയ്ക്കുന്നു . തുറന്ന ആകാശവും കുറേശ്ശെയായി നമുക്ക് നഷ്ടപ്പെട്ടു കൊണ്ടിരിയ്ക്കയാണ്. തലങ്ങും വിലങ്ങും പൊങ്ങിയും നിവർന്നും കാണപ്പെടുന്ന ഫ്ളൈ ഓവറുകളും പ്രധാന പാതകളും  നഗരത്തിന്റെ ഞരമ്പുകൾ പോലെ എഴുന്നു നിൽക്കുന്നു. ഉയരങ്ങൾ തേടാൻ ഇവിടെയെത്തപ്പെടുന്നവരെപ്പോലെത്തന്നെ ദിനം പ്രതി  കെട്ടിടങ്ങൾ മുകളിലേയ്ക്കായുയരുമ്പോൾ അപൂർവ്വമായി കാണപ്പെടുന്ന ഇത്തരം കാഴ്ച്ചകൾ നഷ്ടപ്പെടാതിരുന്നെങ്കിൽ എന്നു മനസ്സ് കൊതിച്ചു പോകുകയാണ്.

നഗരത്തിന്റെ മുഖഭാവം മാറുന്നതു കാണാനെന്തു ഭംഗിയാണെന്നോ? പകലിന്റെ അദ്ധ്വാനഭാരം വിയർപ്പൊഴുക്കുന്ന നഗരമുഖത്തിന്റെ തിടുക്കം കലർന്ന ഗതി നമുക്കേറെ പരിചിതം തന്നെ. സന്ധ്യയുടെ ഭംഗിയിൽ മയങ്ങി നിൽക്കാനാകാതെ ചേക്കേറാനുള്ള തത്രപ്പാടിലെ  ഓട്ടവും നമുക്കു സുപരിചിതം. അങ്ങാടിത്തിരക്കൊഴിഞ്ഞ് ബാക്കി വരുന്ന വാണിഭങ്ങൾ കെട്ടിപ്പൂട്ടുന്ന കച്ചവടക്കാരെ രാത്രി വൈകുന്ന വേളയിൽ കാണുമ്പോൾ അറിയാതെ മനസ്സ് അവരുടെ ഒരു ദിനത്തിന്റെ കാഠിന്യത്തിന്റെ കണക്കുകൾ കൂട്ടുന്നു. ശരിയാണ്, മറ്റുള്ളവർക്ക് വെളിച്ചമേകാനായി സ്വയമുരുകിത്തീരുന്ന മെഴുകുതിരികൾ!

തണുപ്പിന് ശക്തി കൂടി വരുന്നു. രാവിലെ മൂടൽമഞ്ഞിന്നിടയിലൂടെ അരിച്ചെത്തുന്ന സൂര്യരശ്മി ദേഹത്ത് പതിയ്ക്കുമ്പോഴെന്തു സുഖം. മുംബൈയിലെ തണുപ്പ്  സുഖകരമായ ഒന്നു തന്നെ.  നനുത്ത കാറ്റും തണുപ്പും വൈകുന്നേരങ്ങളിലെ നടത്തത്തിന് സുഖം കൂട്ടുന്നു. തണുപ്പകാലത്തിന്റെ ഈ ഹൃദ്യത നഗരത്തിന്റെ വിവിധഭാഗങ്ങളിലായി   ദിനം പ്രതി നടക്കുന്ന ഒട്ടേറെ സംഗീത പരിപാടികൾക്ക് കൊഴുപ്പേറ്റുന്നു. നരിമാൻ പോയന്റിലെ എക്സ്പിരിമെന്റൽ തിയറ്ററിൽ നടക്കുന്ന രാമായണ’ ടോക് ആൻഡ് ഡാൻസ് ഷോ പുതുമയിയന്ന വിധം കലാരംഗത്തെ പരീക്ഷണ കുതുകികളെ ശരിയ്ക്കും ആകർഷിച്ചു കാണും. നഗരം മാരത്തോൺ ഓട്ടത്തിന്നായി ചൂടു പിടിച്ചു വരുന്നു. മുംബൈ മാരത്തോൺ പല പ്രത്യേകതകളും നിറഞ്ഞ ഒന്നു തന്നെയാണ്.മുംബെ നൽകുന്ന ഈ വിസ്മയത്തിന്നായും നമുക്ക് കാത്തിരിയ്ക്കാം….

Leave a Reply

Your email address will not be published. Required fields are marked *