റിപ്പബ്ലിക് ദിനാശംസകൾ… മുംബൈ പൾസ്-39

Posted by & filed under മുംബൈ പൾസ്.

എത്ര വേഗമാണു സമയം കടന്നു പോകുന്നത് എന്നു തോന്നിപ്പോകുകയാണു. നവവത്സരം എത്തിയതിന്റെ ആഘോഷധ്വനി അവസാനിച്ചതേയുള്ളൂ, ഇത എത്തിക്കഴിഞ്ഞല്ലോ റിപ്പബ്ലിക് ദിനം. രാജ്യത്തിന്റെ അറുപത്തി മൂന്നാമത്തെ റിപ്പബ്ലിക് ദിനം. ലൈവ് ടെലെകാസ്റ്റ്  ടെലിവിഷനിലൂടെ കാണുമ്പോൾ മനസ്സുകൊണ്ട് പലപ്പോഴും അഭിമാനം തോന്നാറുണ്ട്.രാഷ്ട്രീയപരമായ പല അഭിപ്രായവ്യത്യാസങ്ങളും മറന്ന് നാടിനെക്കുറിച്ചഭിമാനം കൊള്ളാനായുള്ള ഒരു ദിനം.എല്ലാവർക്കും റിപ്പബ്ലിക് ദിനാശംസകൾ1

കഴിഞ്ഞ ദിവ്സം മുംബൈ നഗരിയിൽ മുംബൈ കവികളെക്കുറിച്ച് ഒരു ചർച്ച നടന്നു. മുംബൈ കവിതകളിലെ നെല്ലും പതിരും അവലോകനം ചെയ്യലായിരുന്നു ചർച്ചാവിഷയം. വിശിഷ്ടതിഥിയായി മലയാൾ സിനിമാ ഗാന രംഗത്തെ അറിയപ്പെടുന്ന രചയിതാവ് ശ്രീ ചുനക്കര രാമൻ കുട്ടി ആയിരുന്നുവെന്നത്  ചർച്ചയ്ക്കു ആകർഷണമേകി. എങ്കിലും ഒരു വർക്കിംഗ് ഡേയിൽ ഇത്തരം പരിപാടികൾ വരുമ്പോൾ നഗരത്തിന്റെ വിവിധ ഭാഗങ്ങളിലായിക്കിടക്കന്ന കവിതാപ്രേമികളിൽ സന്തോഷം കുറയാൻ കാരണമാകുന്നു. വൈകിയെത്താനും വരാതിരിയ്ക്കാനും  സാധ്യതകൾ കൂടുന്നു.

കാവ്യ വിഷയത്തിലും ആവിഷ്ക്കാരരീതിയിലും മികച്ചു നിൽക്കുന്ന കവിതകൾക്ക് ആസ്വാദനതലത്തിൽ മുൻനിരയിലെത്താനാകുന്നു.പാരമ്പര്യവഴികളിൽ നിന്നുള്ള വ്യതിയാനവും ആനുകാലികവും സാമൂഹികപ്രസക്തവുമായ വിഷയങ്ങളും പ്രതിപാദ്യവിഷയമായി മാറിക്കൊണ്ടിരിയ്ക്കുന്നു. നീട്ടിച്ചൊല്ലാനാകുന്ന താളവൃത്ത നിബന്ധമായ കവിത പിൻ നിരയിലേയ്ക്ക് നീങ്ങിക്കൊണ്ടെയിരിയ്ക്കുന്നു. സാഹിത്യം പൊതുവേയും കവിത പ്രത്യേകിച്ചും   കാലത്തിന്റെ സ്പന്ദനത്തിന്റെ ശബ്ദം തന്നെയാണല്ലോ?  കാലത്തിന്റെ മാറ്റം അപ്പോൾ കവിതയിലും പ്രതിഫലിയ്ക്കാതിരിയ്ക്കുന്നതെങ്ങിനെ? കവിതാസ്വാദകരിൽ എന്നും പഴമയെ കൈവിടാനുള്ള മടിയും പുതിയതിനെ  സശയം കലർന്ന ദൃഷ്ടിയോടേ വീക്ഷിയ്ക്കലും കണ്ടു വരുന്നു. ഇതു തന്നെയല്ലേ മനുഷ്യജീവിതത്തിലും നടക്കുന്നത്? കാലത്തിനൊത്തു മാറാതിരിയ്ക്കാനാകുന്നുമില്ല, പാരമ്പര്യങ്ങളെ പാടെ മറക്കാൻ മടിയും. എന്തായാലും കവിതാചർച്ചയിൽ പങ്കെടുക്കാനായി പല വിധത്തിലും ബുദ്ധിമുട്ടുകൾ സഹിച്ചു തന്നെ എത്തിക്കൂടിയവർ നഗരത്തിന്റെ തിക്കിലും തിരക്കിലും നാം കൂടെക്കൂട്ടുന്ന  സാഹിത്യപ്രേമത്തെ എടുത്തു കാട്ടാനുതകി. നല്ലൊരു കവിതാസയാഹ്നവും വിശിഷ്ടാതിഥിയായ ശ്രീ ചുനക്കര രാമൻ കുട്ടിയുടെ ഹൃദ്യമായ പ്രസംഗവും “വരം” എന്ന കവിതയുടെ ആലാപനവും സദസ്സിനെ വല്ലാതെ ആകർഷിച്ചു. നാഴികമണിയുടെ സൂചിയിൽ കണ്ണു നട്ടിരിയ്ക്കാൻ മാത്രം പഠിച്ച നമ്മൾ ഒരു നിമിഷം നിൽക്കാനും സമയത്തിനോടഭ്യർത്ഥിച്ചുവോ എന്നു തോന്നിപ്പോയി.

നഗരത്തിൽ ഈ വർഷം തണുപ്പുകാലം അൽ‌പ്പം നീണ്ടേയ്ക്കാമെന്നും മാർച്ചു വരെ നല്ല സുഖകരമായ കാലാവസ്ഥ പ്രതീക്ഷിയ്ക്കാമെന്നും കാലാവസ്ഥ നിരീക്ഷകർ കണക്കു കൂട്ടുന്നു. ഇതിനപ്പുറം വരുന്ന വേനൽക്കാലവും ഇതു പോലെ മുംബെയിലെ താമസം കൂട്ടാൻ ശ്രമിയ്ക്കുമോ എന്ന ഭീതി നഗരവാസികൾക്കില്ലാതില്ല. എന്തായാലും തണുപ്പിന്റെ ഹൃദ്യതയെ കഴിയുന്നത്ര മുതലെടുക്കാൻ നഗരത്തിന്റെ ഹൃദയഭാഗങ്ങളിലും പ്രാന്തങ്ങളിലുമായി നടക്കുന്ന കലാ സാംസ്കാരിക പരിപാടികൾ വഴിയൊരുക്കുന്നു. കേളിയുടെ മുഴക്കം അവസാനിച്ചതേയുള്ളൂ, ഇതാ ഡൊംബിവിലിയിൽ ഗുഡ് നൈറ്റ് സൂര്യ ഫെസ്റ്റിവൽ തുടങ്ങുകയായല്ലോ? കലാക്ഷേത്രത്തിന്റെ ആഭിമുഖ്യത്തിൽ ജനുവരി 27 മുതൽ 31 വരെ നടത്തപ്പെടുന്ന ഈ കേരള ഫെസ്റ്റിവലിൽ  മലയാളത്തനിമ വിളിച്ചോതുന്ന കഥകളി, പറയൻ തുള്ളൽ, മോഹിനിയാട്ടം,ചാക്യാർ കൂത്ത്, പാവക്കഥകളി,ശീതങ്കൻ തുള്ളൽ, നങ്ങ്യാർ കൂത്ത് എന്നിവയ്ക്ക് പുറമേ നാടൻ കലകളായ പുള്ളുവൻ പാട്ടു, നന്തുണ്ണിപ്പാട്ട്,പൂതൻ, തിറ എന്നീ വേഷങ്ങൾ കെട്ടിയാടൽ എന്നിങ്ങനെ വൈവിധ്യമേരിയ ഒട്ടനവധി കലാരൂപങ്ങൾ കാണാനാകും. തീർച്ചയായും മുംബൈ മലയാളിയ്ക്കു അഭിമാനിയ്ക്കാൻ വക നൽകുന്ന ഒന്നുതന്നെ. ഡോംബിവിലി പാണ്ടുരംഗവാടിയിലെ മോഡൽ ഇംഗ്ലീഷ് സ്കൂൾ ആണു വേദി.

ഫിബ്രവരി ഇനിയും കൂടുതൽ ആകർഷകമായ സമ്മാനങ്ങളുമായി നമ്മെ കാത്തിരിയ്ക്കുന്നു. നാദോപാസനയുടെ ഒമ്പതാമത് വാർഷിക സംഗീതോത്സവം ഫിബ്രവരി മൂന്നു മുതൽ അഞ്ചുവരെ നടക്കുന്നത് ഡോംബിവിലി പൊന്നു ഗുരുവായൂരപ്പൻ അമ്പലത്തിനു സമീപത്തായുള്ള മാഡ്വി ഇംഗ്ലീഷ് സ്കൂളിൽവച്ചാണ്. നാമസങ്കീർത്തനം,ജി.രഘുനാഥിന്റെ പുല്ലാംകുഴൽ കച്ചേരി,കൊച്ചു പ്രതിഭകളുടെ കച്ചേരികൾ, ശ്രീ ശങ്കരൻ നമ്പൂതിരിറ്റ്യുടെ കച്ചേരി,ഹരികഥാകാലക്ഷേപം , ദിലീപ് കുമാറിന്റെ കച്ചേരി എന്നിങ്ങനെ അത്യധികം ഹൃദ്യമായ ഒരു വിരുന്നു തന്നെയാണു നാദോപാസന നഗരത്തിലെ സംഗീതപ്രേമികൾക്കായി ഒരുക്കിയിരിയ്ക്കുന്നത്. തണുപ്പേരിയ ജനുവരി-ഫിബ്രവരി മാസങ്ങൾ തന്നെയാണ് ഇത്തരം കലാ-സംഗീതവിരുന്നുകൾക്ക് പറ്റിയ സമയം എന്നു തോന്നാറുണ്ട്. നേർത്ത തണുപ്പിലൂടെ അരിച്ചെത്തുന്ന സംഗീത വീചികൾ ശരിയ്ക്കും മനസ്സിനെ തോട്ടുണർത്താൻ പ്രേരകമാകുന്നു. നമുക്ക് ആ അനുഭൂതികൾക്കായി കാത്തിരിയ്ക്കാം.

എങ്കിലും  ചിലപ്പോൾ തോന്നിപ്പോകുന്നു, മലയാളിയുടെ ഗൃഹാതുരത മറ്റുള്ളവരെ അപേക്ഷിച്ചു ഒരൽ‌പ്പം കൂടുതലാണോ എന്ന്. രാജ്യത്തിന്റെ അല്ലെങ്കിൽ ലോകത്തിന്റെ തന്നെ ഏതു കോണിലെത്തിയാലും അവിടെ തന്റെ കൊച്ചു കേരളത്തിന്റെ ഒരു പതിപ്പ് സൃഷ്ടിയ്ക്കുന്നതിനുള്ള അവന്റെ വ്യഗ്രത മറ്റെന്താണ് സൂചിപ്പിയ്ക്കുന്നത്? ഒരൽ‌പ്പം മാറി നിന്നു നോക്കുമ്പോൾ ഒരു പക്ഷേ പല വസ്തുക്കളും കൂടുതൽ ആകർഷകമായിത്തോന്നുന്നതു പോലെ. ഉള്ളിന്റെയുള്ളിലെ ഒരു നഷ്ടബോധത്തിനെ പുതിയതായുള്ള വെട്ടിപ്പിടുത്തങ്ങൾക്കൊന്നിനും തന്നെ നീക്കാനാകില്ലെന്ന സത്യം തന്നെയല്ലേ ഇത്?

തണുപ്പുകാലം സമ്മാനിയ്ക്കുന്ന ശാപൺഗളെയും നഗരവാസിയ്ക്കു മറക്കാനാകില്ല. പലതരം അസുഖങ്ങൾ വിട്ടുപോകാതെ നമ്മെ പിടിക്കൂടുന്നു. ആസ്തമക്കാർക്കേറെ ബുദ്ധിമുട്ടുകൾ നൽകുന്ന സമയം ഇതു തന്നെ. പോരാഞ്ഞിട്ടിതാ ഈ വർഷം മരുന്നുകൾ കൊണ്ടും  തടുക്കാൻ കഴിയാത്ത ക്ഷയരോഗാണുക്കൾ നഗരത്തിൽ വിളയാട്ടം തുടങ്ങിയിരിയ്ക്കുന്നു. വളരെയേറെ ഗൌരവപൂർണ്ണമായിത്തന്നെ കാണേണ്ടുന്ന ഈ സ്ഥിതിവിശേഷം എത്രയും വേഗം നിർമ്മാഞ്ജനം ചെയ്യുന്നതിനായുള്ള ഗവണ്മെണ്ടിന്റിന്റെ ശ്രമൺഗൾ വിജയിയ്ക്കുക തന്നെ വേണം. നിയന്ത്രണാതീതമാകുന്നതിനു മുൻപേ അതിനു കഴിയുകയും വേണം. ഇപ്പോൾ വിരലിലെണ്ണാവുന്നവയാണെങ്കിലും വളരെ ചുരുങ്ങിയ സമയം കൊണ്ട് ഒരു ഭീതിദമായ അന്തരീക്ഷം സൃഷ്ടിയ്ക്കാൻ ഈ രോഗത്തിന് കഴിഞ്ഞെന്നു വരാം. എന്തായിരിയ്ക്കാം ഇതിനു കാരണമെന്നും ചിന്തിയ്ക്കേണ്ടിയിരിയ്ക്കുന്നു. നഗരത്തിന്റെ ശോചനീയമായ ശുചിത്വക്കുറവിനു നേരെത്തന്നെയാണൊ ഇത്തരം അസുഖങ്ങളും വിരൽ ചൂണ്ടുന്നത്?

മറ്റു പല വിദേശ രാജ്യങ്ങളേയും പോലെ  ഒരു കാലത്തും ശുചിത്വത്തിന് പ്രാധാന്യം കൊടുക്കുവാൻ നമുക്കു കഴിയില്ലെന്നുണ്ടോ? നോർവീജിയൻ ചൈൽഡ് കെയർ സർവീസ് ഇന്ത്യൻ എൻ. ആർ. ഐ. ദമ്പതികളിൽ നിന്നും അവരുടെ കൊച്ചു കുഞ്ഞുങ്ങളെ അടർത്തി മാറ്റിയതിനു പിന്നിൽ അവർ കാരണമായിക്കണ്ടതീ ശുചിത്വക്കുറവു തന്നെയാണെന്നതു മറക്കാനാകില്ല. നമ്മുടെ കണ്ണിൽ അതു സ്നേഹാ‍ധിക്യം മാത്രമാണെങ്കിലും. കുട്ടിയെ കൂടെക്കിടത്തുന്നതും പ്രത്യേകം കിടയ്ക്ക കൊടുക്കാത്തതും അവർ തെറ്റായി കാണുന്നു. കൈ കൊണ്ടു ഭക്ഷണം കൊടുക്കുന്നത് ശുചിതത്തിന്റെ കുറവും, നിർബന്ധിയ്ക്കലും. കാല ദേശങ്ങൾക്കനുസൃതമായ മാറ്റങ്ങൾ ഉൾക്കൊള്ളാൻ നാം  പലപ്പോഴും നിർബന്ധിതരായിത്തീരുന്നു. കൂടുതൽ പച്ചയാർന്ന മേച്ചിൽ‌പ്പുറങ്ങൾ തേടിയിറങ്ങുന്ന പ്രവാസിയ്ക്കു കിട്ടുന്ന മറ്റൊരു ശിക്ഷ തന്നെയാണിത്. ‘ചേരയെത്തിന്നുന്ന നാട്ടിൽ ചെല്ലുമ്പോൾ നടുത്തുണ്ടം“ എന്നു പറയുന്നത് ശരി തന്നെ, അല്ലേ?

(Published in’ WHITELINE VARTHA’ (print) Newspaper weekly tabloid from Mumbai .See www.whitelineworld.com)

Leave a Reply

Your email address will not be published. Required fields are marked *