ഒന്നു നിൽക്കൂ ..ഒരൽ‌പ്പം ചിരിയ്ക്കൂ…

Posted by & filed under Uncategorized.

There is nothing in the world so irresistibly contagious as laughter- Charles Dickens

പൊട്ടിച്ചിരിയേക്കാളേറെ ചെറുക്കാനാകാത്തവിധം പടർന്നു കയറുന്ന മറ്റൊന്നും തന്നെ ഈ ലോകത്തിലില്ല എന്ന ചാൾസ് ഡിക്കൻസിന്റെ പ്രസിദ്ധമായ ഈ വരികൾ എത്ര സത്യം. ജീവിതത്തിൽ പലപ്പോഴായി അനുഭവങ്ങളായി അവ മുൻപിൽ വന്നു നിന്നിട്ടുണ്ട്. പലപ്പോഴായി വന്നെത്തിയവയിലെ അവിചാരികത അത്ഭുതപ്പെടുത്തിയിട്ടുമുണ്ട്. അതിന്റെ മനോഹാരിത പിന്നീടു ചിന്തകൾക്ക് വഴി നൽകിയിട്ടുണ്ട്. അപ്പോഴൊക്കെ മനുഷ്യനു കിട്ടിയ ഈ പ്രത്യേക വരദാനത്തിനു മനസ്സുകൊണ്ടു നന്ദി പറയാതിരിയ്ക്കാനായിട്ടില്ല.കാരണം മനുഷ്യനു മാത്രമേ കരയാ‍നും ചിരിയ്ക്കാനുമുള്ള കഴിവ് ഇത്ര നന്നാ‍യി കൈ വന്നിട്ടുള്ളൂ. ഒരു പൊട്ടിച്ചിരി തരുന്ന മനസ്സുഖം, സന്തോഷം, ആരോഗ്യം, സമാധാനം എന്നിവയ്ക്കൊക്കെത്തുല്യമാ‍യൊരു മരുന്ന് ഇനിയും കണ്ടു പിടിയ്ക്കാനിരിയ്ക്കുന്നതേയുള്ളൂ.

ചിരികൾ തന്നെ എത്രവിധത്തിൽ..എത്ര അർത്ഥതലങ്ങളിൽ. പുഞ്ചിരിയും പൂപ്പുഞ്ചിരിയും,പൊട്ടിച്ചിരിയും, കളിയാക്കും വിധമുള്ള ചിരിയും, നാണം കലർന്ന ചിരിയും എല്ലാം എത്ര പെട്ടെന്നു നമുക്കു തിരിച്ചറിയാനാകുന്നു, അല്ലേ?ഇന്നത്തെ മനുഷ്യൻ തന്റെ പലവിധ കാര്യസാദ്ധ്യങ്ങൾക്കായി ഈ ചിരികളെയൊക്കെ വേണ്ടും വണ്ണം ഉപയോഗിയ്ക്കാനും പഠിച്ചു കഴിഞ്ഞിരിയ്ക്കുന്നു. സ്വയം അഭിനന്ദിയ്ക്കുന്ന തരം ചിരികളിലേയ്ക്കുള്ള ഒരു വഴി മാത്രമായി ഇന്ന് ചിരി മാറിയിരിയ്ക്കുന്നു.സ്വാർത്ഥതയുടെ പാരമ്യതയിൽ മാത്രം ചിരിയ്ക്കാൻ മനുഷ്യൻ തയ്യാറാവുന്നു.
സാധാരണ ജീവിതത്തിലെ ദൈനംദിന ത്തിരക്കുകൾക്കിടയില്പെട്ടു നഷ്ടമാകുന്ന ഒന്നായി ചിരി മാറിയിരിയ്ക്കുന്നു. ചിരിയെന്നതിപ്പോൾ നമ്മൾ അപൂർവ്വം മാത്രം ഉപയോഗിയ്ക്കുന്ന ഒന്നാണ്. അടുക്കളപ്പുറകിലെ ഒതുക്കിച്ചിരികളും പൂമുഖത്തു നിന്നും ഉയരുന്ന പൊട്ടിച്ചിരികളും, കളിക്കളത്തിൽ നിന്നുമുയരുന്ന ആർപ്പുചിരികളും പെൺകുട്ടികൾക്കിടയിലെ നാണത്തിൽ കുതിർന്ന കളിയാക്കലുകളുയർത്തുന്ന ചിരികളുമൊക്കെ എവിടെയോ നഷ്ടപ്പെട്ടിരിയ്ക്കുന്നു.ജീവിതത്തിലെ സമ്മർദ്ദങ്ങളെ കുറയ്ക്കുവാൻ ഏറ്റവും അത്യന്താപേക്ഷിതമായ ഒന്നാണു ചിരിയെന്നത് നാം മറന്നു പോയിരിയ്ക്കുന്നുവോ?ഉള്ളു തുറന്നു ചിരിയ്ക്കാനുള്ള ഉപാധികൾ പണ്ടൊക്കെ നൈസർഗ്ഗികമായവിധത്തിൽ കൈ വന്നിരുന്നു. പലപ്പോഴും പിരിമുറുക്കങ്ങളിൽ നിന്നും മോചനം നേടാനും ലാഘവത്വം കൈവരിയ്ക്കാനും തമാശകൾ പറഞ്ഞു പൊട്ടിച്ചിരിയ്ക്കാറുണ്ട്. ഇത്തരം വേളകൾ മരുന്നിനെക്കാളേരെ ഫലപ്രദമായവയായി മാറുന്നു. സ്വന്തം ദു:ഖങ്ങളെ ഈ വേളയിൽ മറക്കുന്നതു കൂടാതെ ശാരീരികമായി ചിരിയെന്ന പ്രവൃത്തി നമുക്കു ഒട്ടനവധി ഗുണങ്ങൾ ചെയ്യുന്നുണ്ട്. അതിന്റെ പ്രതിഫലമോ,മനസ്സിനും ശരീരത്തിനും ഒരേപോലെ ഉന്മേഷം ലഭിയ്ക്കുന്നു. ഇതൊക്കെ അറിഞ്ഞിട്ടും നമ്മൾ ചിരിയ്ക്കാൻ മടിയ്ക്കുന്നതെന്തേ?
പ്രത്യേകിച്ചു കാരണമൊന്നും പറയാനില്ലെങ്കിലും, കൂടുതൽ തിരക്കാർന്ന ജീവിതത്തിന്റെ ഇരയായി മാറുന്ന മനുഷ്യൻ സദാ പിരിമുറുത്തിലാണിപ്പോൾ എന്നു പറയുന്നതാണ് ശരി. ഒന്നിനും സമയമില്ല, ചിരിയ്ക്കാൻ പോലും മറന്നു പോകുന്നു. കൃത്രിമച്ചിരികൾക്കായൊരുക്കിയ ക്ലബ്ബിൽച്ചേരാനുള്ള ഒരു സുഹൃത്തിന്റെ ക്ഷണമാണിതെഴുതുവാൻ എന്നെ പ്രേരിപ്പിച്ചത്.കഷ്ടം തോന്നി. നന്ദി, സുഹൃത്തേ, പക്ഷേ ഒരു കൃത്രിമച്ചിരി എനിയ്ക്കാവശ്യമില്ലെന്നു തോന്നുന്നു. കാരണം ഞാനിനിയും വേണ്ട സമയത്തെല്ലാം ചിരിയ്ക്കാൻ മറന്നിട്ടില്ല. മാത്രവുമല്ല, യാതൊരു ചിലവും കൂടാതെ അന്യർക്കായി എപ്പോഴും കൊടുക്കാവുന്ന ഏറ്റവും വലിയ സമ്മാനമായി അതിനെ ഞാൻ മാനിയ്ക്കുകയും ചെയ്യുന്നു.
ഒരു ചെറിയ ചിരി ഒരുപക്ഷേ ഒരാളുടെ ഒരു ദിവസത്തെ ധന്യമാക്കിയെന്നിരിയ്ക്കം.കാരണം ചാൾസ് ഡിക്കൻസ് പറഞ്ഞതുപോലെ ചിരിയെന്നത് തടുക്കാനാവാത്തവിധം പകരുന്ന ഒന്നാണ്,. അല്ലെങ്കിൽ ഒരു ഫ്ലൂ പോലെ പകരുന്ന ഒന്നാണ്. ഒരാൾ എന്നെ നോക്കി ചിരിയ്ക്കുമ്പോൾ സ്വാഭാവികമായും എനിയ്ക്കും ചിരിയ്ക്കാനാകുന്നത് അതുകൊണ്ടു തന്നെയാണല്ലോ. പിരിമുറുക്കങ്ങൾ കുറയ്ക്കാനും , സ്വാസ്ഥ്യം കിട്ടാനുമായി ചിരിയങ്ങനെ പടരട്ടെ.നൈസർഗ്ഗികമായിത്തന്നെ ചിരിയ്ക്കാൻ പഠിയ്ക്കൂ.ആരോഗ്യത്തിനും സന്തോഷത്തിനും വഴി തെളിയിയ്ക്കൂ.

(http://www.koottam.com/blogs/152644/13/-)

Leave a Reply

Your email address will not be published. Required fields are marked *