ഒരു ‘സ്വകാര്യ‘ പ്രാര്‍ത്ഥന

Posted by & filed under കവിത.

ഒന്നുമില്ലെനിയ്ക്കായി പ്രാര്‍ത്ഥിയ്ക്കാനെന്നാലെനി-
യ്ക്കുണ്ടല്ലോ ദേവാ,പറഞ്ഞീടുവാന്‍ രഹസ്യമായ്
ഒന്നല്ലൊരയ്യായിരം കാര്യങ്ങളെന്നാലിന്ന-
തൊന്നും ഞാന്‍ പറയില്ലയൊന്നുമാത്രമേവേണ്ടൂ!

പണ്ടെന്നും പലര്‍ക്കുമങ്ങേകിയില്ലയോ രക്ഷ-
യിന്നെന്റെ ശംഭോ!ഞാ‍നും കേഴുന്നു,കരുണയ്ക്കായ്
എന്‍മനം നൊന്തു ഞാനുമുരുകീടുന്നു, വന്നെന്‍
കണ്‍തുടച്ചീടാനായിപ്രാര്‍ത്ഥിപ്പു,കേട്ടീടണേ!

എന്തു ഞാന്‍ വരംചോദിപ്പെന്നു നീയറിയുന്നു-
വെങ്കിലുമൊരുവട്ടം കൂടി ഞാന്‍ പറയട്ടേ?
എന്നിലെ മനുഷ്യത്തമൊന്നുണര്‍ത്തീടാനൊട്ടു-
കണ്‍ തുടച്ചന്യന്‍ ദുഖമൊന്നൊരിത്തിരി മാറ്റാന്‍!

ഇന്നു ഞാന്‍ ചുറ്റും കാണ്മതൊന്നുമാത്രമീ മായാ-
ബന്ധനവലയമതിന്‍പുറമെന്തൊന്നാമോ?
ഇന്നു ഞാന്‍ നാളെ നിനക്കെന്നറിഞ്ഞിട്ടും നര-
നെന്തിതേ വലയത്തിന്നുള്ളിലായൊതുങ്ങുന്നു?

സഹിയ്ക്കാന്‍,പൊറുത്തിടാനാത്മനൊമ്പരമതു-
മറക്കാന്‍,സ്നേഹിച്ചിടാന്‍കഴിവുണ്ടായീടണേ!
മനസ്സു മുട്ടിയന്യനായി ഞാന്‍ പ്രാര്‍ത്ഥിച്ചെന്നാ-
ലൊരൊട്ടു സുഖമവന്നുണ്ടായിവന്നീടണേ!

9 Responses to “ഒരു ‘സ്വകാര്യ‘ പ്രാര്‍ത്ഥന”

  1. നിലാവര്‍ നിസ

    നല്ല പ്രാര്‍ത്ഥന..

  2. മിന്നാമിനുങ്ങുകള്‍ //സജി.!!

    പൊറുത്തിടാനാത്മനൊമ്പരമതു-
    മറക്കാന്‍,സ്നേഹിച്ചിടാന്‍കഴിവുണ്ടായീടണേ!

  3. വേണു venu

    എന്നിലെ മനുഷ്യത്തമൊന്നുണര്‍ത്തീടാനൊട്ടു-
    കണ്‍ തുടച്ചന്യന്‍ ദുഖമൊന്നൊരിത്തിരി മാറ്റാന്‍!

    നല്ല പ്രാര്‍ത്ഥന.!

  4. പുടയൂര്‍

    സഹിയ്ക്കാന്‍,പൊറുത്തിടാനാത്മനൊമ്പരമതു-
    മറക്കാന്‍,സ്നേഹിച്ചിടാന്‍കഴിവുണ്ടായീടണേ!
    മനസ്സു മുട്ടിയന്യനായി ഞാന്‍ പ്രാര്‍ത്ഥിച്ചെന്നാ-
    ലൊരൊട്ടു സുഖമവന്നുണ്ടായിവന്നീടണേ!
    🙂

  5. മനു സി കുമാര്‍

    കുഴപ്പമില്ല. അറുപതുകളിലേക്ക് മടക്കമെന്തിനാണ് കവിതയില്‍….

    താളം നല്ലതാണ് കവിതയുടെ കാന്പ് കളയില്ലെങ്കില്‍ മാത്രം

  6. jyothirmayi

    ഒരല്‍പ്പം പഴഞ്ചനായി തോന്നി, അല്ലെ! ശരിയാവാം…അവനവനു വരുമ്പോഴേ മനുഷ്യന്‍ ദു:ഖത്തിന്റെ വിലയറിയൂ എന്നു പറയാറുണ്ടു,.! അപ്പോള്‍ പഴഞ്ചനാണോയെന്നവന്‍ ചിന്തിയ്ക്കാറില്ല…ഇതും ഒരു ഉള്ളു ചുട്ട പ്രാര്‍ത്ഥനയായതിനാല്‍ എനിയ്ക്കുമതില്‍ വിഷമം തോന്നുന്നില്ല….തീര്‍ച്ചയായും മറ്റൊരാള്‍ക്കു വേണ്ടീത്തന്നെ!

  7. Ajith

    പ്രാര്‍ത്ഥന ഭഗവാനു ഇഷ്ടപ്പെട്ടുകാണുമെന്ന് കരുതുന്നു

  8. ഞാന്‍ ശ്രീ..

    ഞാന്‍ സത്യത്തില്‍ ആ കവിതയെയല്ല ശ്രദ്ധിച്ചത്….ആ പ്രര്‍ത്ഥനയെ….മനുഷ്യന്‍ മറന്നുപോകുന്ന ….കണ്ടിട്ടും കാണാതെ പോകുന്ന അന്യന്റെ ദു:ഖത്തെ… കണ്ണീരിനെ…ഓര്‍മ്മിച്ചതിനു കവിത ഒരു നിമിത്തമായെന്നു പറയാം….

    എത്ര വര്‍ഷം പിന്നോട്ടു പോയാലും…എത്ര പഴഞ്ചനെന്നു വിളിച്ചാലും….ഒരെഴുത്തുകാരനില്‍/കാരിയില്‍ വേണ്ട ആദ്യ ഗുണമാണ് സഹജീവികള്‍ക്കായുള്ള പ്രാര്‍ത്ഥന…

    ഇനിയും എഴുതുക…..
    സ്നേഹത്തോടെ
    അനുജന്‍
    ശ്രീ.

  9. Sreekumar

    You are simply superb………………………..

Leave a Reply

Your email address will not be published. Required fields are marked *